Tanha Kaynaat

Main aksar apne saath hoti hoon
Kabhi subah ki sunehri kirno mein lehlahaati hui
Kabhi shaam ki mastt khunki mein gungunaati hui

Main aksar apne saath hoti hoon....
Waqt ke saath qadam milaati hui
Apne aap se khush, muskuraati hui....


Khud apne saath baithi hui
Kabhi  ugtey huay sooraj  ko
Kabhi udti hui chidiyon ko
Kabhi hanstey huay phoolon ko
Kabhi sharmaati hui ghaas ko
Kabhi paas aati hui titli ko
Kabhi doorr jaati hui ghataaon ko
Kabhi  nikhre huay chaand   ko
Kabhi behkey huay mausam ko

Apne dil mein apni aankhon se mehsoos kiya karti hoon


Unn ko wo  kyon  nahi dikhta
Jo  mujh ko nazar aataa hai  .......
Wo log jo kehtey hain ke
Apni tanhaai mein kahiin  khoii si main rehti hoon

Aakhir Kyon.....

This is  dedicated to a young couple very very dear to me.....I wish they would always  be together..................... for me they always will be.............
But in reality they are not .....................................................................


"Kyon bantey hain wo rishtey jin ki qismat  hai bikharna
Kyon miltey hain wo dil jin ki qismat hai ujadna

Wo tera  milna, phir baarha mujh se wo takrana tera
Meri qismat  thi....ya ke  thi wo qismat teri

Kyon jud gayi  chand din ko teri qismat se qismat meri.....

Kyon qareeb aaye thay hum jo tha aise hi chaley janaa
Kya karoon kaise sambhaloon main judaai ka ye nazranaa

Le jaa yaadein apni, de de waapis meri tamannaein
Warna amaanat mein khayanat ka bhi ilzaam lagey ga mujh par

Dil ke aangan mein ye  kirchein..... kitni chubhti hain
Kabhi paaon mein.... kabhi aankhon mein bhi lagti hain


Ek aandhi dabey paaon chali aayi thi
Kya ussi ne machaai hai tabaahi itni

Zara aansoo tham jaaein to dekhoon....
Thoda behlay jo ye dil, to zehen kaam karey....

Kyon baney thay wo rishtey
Jin ki qismat mein bikharna tha......